房L的誕生12 - 剛剛捱得過，裁員又黎過

上回講到金融海瀟，公司都唔多掂，我唯有盡力保住份工。我自己都幾大男人，果時成家既支出基本上我自己頂晒，老實講有苦自己知，果種壓力非外人能夠感受。然後加按出黎既錢，果時又咁好彩輸左成半，蟹貨中，層樓又負資產，好野唔會一齊黎，衰野先會咁樣黎法。果時係公司我連中港速遞都做埋，專幫大老細去送文件等等，求其喇，做擦鞋仔就係咁，乜都要做。

最後，公司當然無開我刀喇，果時公司重有一個好唔好既事發生，發現係每逢公司男同事一結婚跟住就會被炒，果時我其實都安排左結婚，但眼見咁既形勢，都覺得唔對路，唯有自己請幾日假，無同D同事講，結婚就算，後來我懷疑老細係......，不過算喇，佢乜野性取向關我9事咩。

果時我好多謝我前妻，佢無要求過任何野，一切從簡，佢家人也對我無任何金錢要求，實屬難得。最後我地結婚時只係求其同朋友擺幾圍食飯，當其時，我自己也跟我請的親戚朋友說過一番話，就係，你地黎得我就唔需要你地做人情，因為呢到我所請既人全部我都當佢兄弟一樣，我想你地黎飲係真心既開心同恭喜。最終班友仔當然唔聽喇，個個都有俾人情，最終我都係有賺既。

結左婚後，大約大半年，樓價開始好番少少，突然有一日我阿媽打俾我叫我睇下隻股票，跟住我話我好耐無睇佢叫我睇，我一睇之下見到11.xx，頂，果時我5.x買，跌過落2.x 而家上番11.X 重唔即刻賣呀，二話不說即放低晒所有工作，賣左隻野先喇，不問價全走，就係咁樣，我賺左我人生第一桶金。加埋本金好似成100萬，而家100萬就當然好少喇，2009年既一佰萬，對我黎講已經係好多了，果時興奮既心情就好似中左六合彩一樣咁。但開心得無幾耐，就好快又跌到落谷底，因為小道消息聽到公司將會賣盤然後重要摺埋，心諗無咁黑仔呀，當其時緊係週圍去八下喇，點知消息係真既.......黑到呢，果時的確係好驚，剛買左樓，結左婚，點攪? 我自己計過一個月，就算係我唔食都要有20000蚊先剛剛好cover晒D開支，一收到呢個消息，我直頭係幾晚夜晚都瞓唔到，然後每晚係做乜野?每晚係揸住個計數機，死計同爛計，其實點計都好又邊有分別呢。

果時係一D機緣考合既場合下，我竟然遇番一個舊既中學同學，我只知佢做影音生意，然後應該係飲左酒，就同佢講左我公司呢個環境，跟住佢話你不如試下買唐樓收租喇?跟住我心諗，工都就黎無，重買樓?佢話你搵日，約埋一齊去睇樓，我話你知點玩。就係一晚，約左佢係深水步，佢話帶我睇佢D樓，果時只抱住學下野既心態，佢就帶我去左其中一間唐樓，一開門入去，原來係一間唐樓劏左幾間房，而我咁大個仔就係第一次見識乜野叫做劏房了。