• 業Sir

揀車位取紅本

其實星期三要飛北海道,但突然收到掛號,原來珠海買入既單位通知揀車位。星期一,一早9點要揀,先到先揀,咁唯有就星期日坐船上珠海。去到珠海都4點半,再過去我斗門間新屋成個鐘,又塞車,去到發現成個屋苑起好晒了,綠化都做晒,同上次去到時完全不同了。但發現週邊重係不斷起樓,同埋週邊邊唔旺,諗住賴野,就求其係果頭搵間7天酒店過一晚。 食完飯後,超無聊,醒起果頭有井岸步行街,咁就坐摩托過去,6蚊雞,原來兩分鐘就到。一見到,原來不得了,果到旺既程度拍得住東門步行街,重要係街頭原來起左個中信新都會就開業,原來係我以為賴野途中,不經不覺已經變左,我屋苑算係近井岸既其中一個屋苑,而家發現靜中帶旺,又死唔晒。不過新盤都係賴野,唔夠人住,無人氣,個個都係炒,都唔係自用。 第二朝就一早仆過去揀車位,點知發現我果棟既靚位已經被揀了,跟住心諗又話先到先揀,我9點到,第一個都俾人揀左,係國內真係識人好過識字,唯有揀個算為最好既位喇。揀就好快,最終又係洗我幾舊水人仔,之後又即刻坐摩托去斗門汽車站上中山取紅本,車程一小時,11點到中山。最刻就仆去博覽中心新房管所取紅本,點知佢話紅本係舊房管所,真係%$#%$^^&,又番去假日廣場,取完紅本剛剛好12點,人地收工,如果今朝唔取紅本,就肯定要下午2:30 先取到了,好鬼彩。之後去附近有間店仔好多人,叫左隻迷你石岐乳鴿,諗住佢細細隻,確唔錯。 然後食飽左就試玩電動摩托,好鬼好玩架,真係可以騎住佢週圍去,好鬼正,香港乜都唔俾,係大陸我感覺自由好多。揸去利和買車飛,由假日廣場附近過去都係兩蚊雞,抵,我重叫班friend 過去一人整一架去鍊車呀,好鬼開心。過到利和,買左飛坐1:15分車,翻到香港4:30。今日算好舒服了,兩日一夜又攪掂左兩件事,而家都盡量將D野group 埋一齊先做了,因為上黎一次而家都幾辛苦,希望遲D港珠澳開左,可以為我帶來方便吧。