• 業Sir

股場七傷拳,一面七傷,七面皆傷

已更新:2018年10月12日

昨日股市最高曾經插超過成千點,外面所有人風聲鶴唳草木皆兵。金毛獅王,唔係,美國佬突然打出一招崆峒派鎮山絕學,七傷拳,所謂一面七傷,七者皆傷,呢鑊真攞命呀,張無忌,啊,唔系,阿爺不慌不忙,雙掌渾圓成盾,使出乾坤大挪移 。阿爺連消帶打,大喝一聲,霎時之間,擂臺鬼影重重,成個場都系阿爺嘅身影。美國佬根本冇辦法分得出邊個先至系阿爺嘅真身。只見美國佬眉頭一皺,計上心頭,左腳(足泵)地,大叫一聲“老師公大顯威力”,原來佢標起童上嚟㖞。 大佬係咁架喇,又唔識股票,我點講,唯有跟破壞王揸住本倚天照讀law。其實識我既人都知我只識玩物業,房L一名,所以唔好問我股票,問股票試下搵我朋友期人。不過今日既分享係,有時股唔股災,你中唔中到都係命水黎。我係33xxx 點時,其實揸左成佰幾萬貨,內裡有科技股地產股銀行股等等,如果繼續Keep 今時今日身家起碼無左4成。但就係一個機緣巧合下我走左,點解? 因為搵到幾件筍盤,加上當其時人仔狂跌,當然係瘋狂9換喇,到而家匯率都蝕架,但個樓價暫時買左起碼又幾硬淨,其它新D既物業可能有跌到,但我買果堆又未感覺到,就當贏架喇。

其實我份人一向唔介意蝕錢走,只要我好確定我跟住買既係一個賺錢既機會,我唔會死坐爛坐,我自問我睇物業既信心同眼光都唔錯。只要我覺得係機會,現在蝕走,我也一定會賺番,物業就可以俾到我實在既感覺,我自問唔多信又買股又買樓,我只覺得強項通常只得一樣,另一樣係副,我就極端少少得一千零一樣。同埋我想帶出一個意思出黎係,你見玩股玩得叻既人好少去研究樓,好多樓既玩法佢唔識,而玩開樓既人,你問佢股票,可能會好似我咁唔多搭到嘴。股票一買一賣好簡單,贏就贏輸就輸,樓唔係,當中預到既問題可以係租霸,裝修,出租等等,而股票你就睇下圖,睇下數據,兩套好唔同既玩法同理論,當你個人唔夠精神分裂就會好易依賴一方去計,人係有感情偏好,不太可行。


一個好專心去做一門學問既人方能大成,自問未見到有人呢樣掂下果樣掂下會攪得好掂。如果你唔信,你可以試下,就睇下自己能否成為新一代萬能插蘇。