2020 大事回顧

2020年過去左,呢一年好壞參半!我好習慣每年去寫一個Review,2020年,股場上,我買得大輸得大,輸左人生最大既一舊錢,但好彩既係多年經營未洗死人,繼續食飯飲酒吹水嬉戲。


財務自由一詞,我發現左每個人既心境原來可以好唔同。我由2016左右做到左,日日唔番工,飲茶食飯,但原來我今年發現呢樣野並不適合我。當我財自時,我原來會選擇好hea 乜都唔做,我係物業上既了解投資,我確實係無退過步,重有進步添,因為呢個興趣,我諗會係我一輩子。我都曾經講過,我既人生所有野待人處事工作都係唔叻,唯獨我對物業感覺較強,我鐘意研究佢,鐘意鑽研新玩法,當然亦因為有眾多高人指點,自己先有進步既地方。


而我自己其它野,就真係由無做野開始後,全部野都係退步,所有野都無留意,活於自我世界,新聞都會少睇左,慢慢,原來自己又build 左個comfort zone 去困住自己。而原來我既comfort zone 就係財務自由,因為會令我無晒斗心。


唔知係巧合定點,朋友再一次指出左自己問題。我決心去跳出呢個comfort zone 我朋友經常同我講,我個人係無中間位,一係好勤力,一係好懶。確實,我選擇左用最極致既方式表現自己,7月我用18日去由150磅減到12x磅,每日百幾組腹肌訓練,維持一個月,引體上升由1下變20下。我份人好勝,唔鐘意人睇唔起,我同朋友講去考警察,佢地會話咪玩喇,最終我用我43歲既年紀起碼pass 晒所有既野,我見到幾個後生仔係體能上都考唔到,而我一take 過,我諗確實只要你肯做,永遠無話唔得。最終會唔會入?需然未必,但我要話俾人知,我只要想做既野,我好少會做唔到。呢個就係我自己要跳出呢個comfort zone 既決心,可能最後係on9,無結果,但我只要證明我自己未廢到要俾人當廢老。


工作方面,年尾我選擇開始番我所有以前懶懶閒既事業,賣樓,按揭轉介,裝修工程.....等等,確實有out到,但好好彩人面還算廣,搵人幫拖吹兩句,所有野消息玩法都收到番黎。搵唔到大錢,但起碼發現,自己呢部老機器開始運作番,吸收番新野。


投資方面好好彩,今年入到兩件工廈,一件大陸一手樓,起碼帳面計升左先,一買即賺,需然補唔到股票輸既錢但起碼,係樓方面還算是長勝將軍,眼光同運氣暫時也算不錯。


慈善方面,其實因緣際匯,發現有d野,以前自己所做唔係做得唔好,只係可以更好,我想幫到更多既人,而首先可能要係做到一個帶頭既作用,要身體力行,我有私心,想積功德,我認。但我呢個私心起碼係想去做好事,世界無人無私心,只係佢既私心有否傷害到人,而我既私心如果係幫到人,我又點解唔去做。


財務自由係我多年來追求既野,得到左但反面係築左一幅圍牆,局限左自己既人生,我原來浪費左好多年我可以做得更好既事。財務自由係咪適合所有人?我諗未必,起碼我發現未必適合我


又係今天的我打倒昨日的我,Never Say Never

2021年我要過得更充實..........

死肥仔的變化實在太大了...............邊個想減肥修身,話我知,我整段視頻教大家,捱得住先好呀

#減肥 #再見2020 #財務自由 #工作




9 次瀏覽

© 2019 業Sir - 樓計識 All rights reserved 

  • Facebook - Grey Circle
  • YouTube - Grey Circle