少有講下投資........... 近日香港亂到呀媽都唔認得，好多生意差到死死下吊住條命，基本上捱得過初一都捱唔過十五。但呢幾個月有一門生意好好搵，係乜? 移民同海外樓呀，我見到每星期同每個FB 都不斷係咁出，不斷係咁賣，人都多去睇架，咁我就知生意應該唔錯。
呢排亦見到有人問我呢方面野好唔好，買唔買，其實每次我問佢，如果你覺得無左管理公司自己都搞得掂管理到計到數你咪去做羅。我只係講左呢樣野，跟住個個都面有難色，接唔到落去，咁跟住就再問唔通買大灣區? 我話我真係唔知你想買邊，但暫時我自己就唔買海外，因為我無左個管理公司的話，我確實管理唔到。但國內如果我無左管理果個人，我會煩架，但唔代表我做唔到，因為一個微信淘寶，我基本上可以解決8成問題，而果兩成問題就係錢，有錢就乜都可以解決。
其實我真係無意去sell 任何人買邊同唔買邊，只係我講出我自己投資既方向同擔心既事，當然每個地方都有佢既問題，就好似國內人仔呢排狂跌同外資管制，D人好驚有入無出等等，唔會每個地方都係無管制，又易管理，所以要好睇個人自己既性格。當然如果你話你打算開間公司請幾個人係當地幫你管理成棟既物業，我當然無野好講喇，但如果你有咁既power 都黎睇我亂吹，我真心覺得你都好俾面下，多謝支持呀。
P.S. 小弟本書其實已經講過海外物業其它問題，有興趣自己可以睇睇