由我人工9000加到14000，以前9000 我可以儲到7000 一個月，當然我有番兼職喇，如果唔係食屎咩。又要俾家用，你問點儲?咪日9日帶飯，唔會跟同事出去食，無戶外活動等等，同朋友出街就人地食扒我食最平既粟米肉粒飯。我D朋友都問我有無咁慳，我話無錢就係咁架喇，佢地食慣好野時我就仍然食平野。到加左人工，其實好開心，開心到，14000 人工，儲得9000........點解? 跟左班同事出去食飯law，其實有時加左人工人就放蹤了。但自己當時已經儲了一些錢，就想買樓自住。我睇過沙果偉華中心，堅尼地城，等等地方，大約由80-120 萬不等，當其時無記錯2001年左右。重要帶埋阿媽睇，阿媽話唔好，又細等等，老實講，我再教大家的話，記住睇樓唔好帶親戚，睇完你一定買唔到樓。
最終都唔知過左幾耐，正正沙士之前半年左右，我家附近有間村屋放賣，價錢56萬，我就同我媽去睇，我阿媽當然話好喇，原來係近佢..... 唉咁咪算law ，買9左佢。56萬果時係村屋兩房一廳4xx尺二樓無天台果隻，我又唔識攪按揭乜9都唔識，息率我都唔記得了，我記得係供10年，每個月4500供款。大家有數得計14000 人工 - 4500供樓，再減平日洗費，家用，正路洗得的唔多。
我又一次用我絕招慳law， 全屋唔裝修，只鋪下地板，我呀媽唔知係邊到搵到個濕9裝修黎做，收左兩萬左右做9晒，水電同鋪地板(到今時今日，我又搬番黎住，先至發現，全屋地磚空心，電線無入喉躂線，重要熱水器無水氣線，之前咁耐都無電9死算我好彩)
當其時兩間房，我只買左一張床，洗衣機雪櫃，上面係床，下面書桌加衣櫃that's all 即係點?? 即係成間屋我只得一張床同凳，廳無sofa ，隔離房無擺野。呢個狀態我維持左大半年，窮無錢就係咁喇，亦無乜人知我買左樓，一向都係 " 貧居鬧市無人間 , 富在深山有遠親"。同埋當其時負面情緒好重，邊想俾人知買左樓呀。跟住無幾耐，就開始左香港人近呢20年最慘痛經歷 SARS(唔係特區，係沙士呀) ........待續
