大家睇下內文，其實呢位李生都算好勁了，每賣一次樓，就換一間大少少既樓。你睇下沙士時蝕60萬去賣，有幾多人夠膽，再用150買層大D既去住，呢個係膽色。然後09年再賣樓，但租左一年，見勢色唔對又以410萬去買樓，終歸呢個單位過千萬資產。
呢位李生心態好強，佢肯蝕賣貴買去追番條數，呢樣野好老實講就算我自己都未必會做到。我自己比較其怪我係見到個機會，通常係一棍就落去，買到我窮為止。我個心唔太甘於貴左再追呢個感覺，但近年心態也在調整中。有試過貴左都再追落去，亦好好彩暫時還算是賺錢。但呢位李生就唔同，佢連續幾次大關都可以咁樣做法，臨危不亂，我相當佩服佢膽色，真係決一不可。如果佢之前有下苦工落物業市場做投資，新家真係會幾何級數咁上。
其實我識好多人係沙士時落錯車，08年亦落左車再無上車，佢地就係過唔到而家個價比當年貴好多，過唔到自己睇錯左個市，但好老實，無辦法，呢個就係現實。你要接受現實，你能夠承認錯誤，先可以克服佢，再搵出另一個機會。永遠自己收埋左自己，唔去接受個錯誤，其實反而係害左你自己。做人點會無犯錯，我細個記過，都不知幾多次喇，例如出貓，衰左，你咪強化自己，唔好再用呢個方法出law，改用其它招，每一次既犯錯，都能使自己進步，方為大成嘛。(我唔知有無小朋友睇，出貓唔好架，出貓係做壞事，細路仔要俾心機讀書，孝順父母專敬師長，長大後供獻社會，為社會謀福利，努力幫老細賺錢) 記住睇錯市，不可恥，唔敢認自己既錯誤，你永遠唔會進化同成長。今次李生好野，真係堅。
70後李先生曾多次上落車，沙士時，第一次換樓。「99年首個物業實用面積約300呎，當年樓價120萬，因為沙士樓價偏低，我想乘機轉換較大型單位，最後劈價60萬元以60萬元沽出，蝕足一半價樓，然後再以150萬來換取500呎單位，依家都無法想像當年樓價。」
09年環境金融海嘯，嚴重衝擊全球經濟，樓價急跌，李生對樓市沒信心，決定賣樓轉租，以250萬放售單位，賣樓後帳面賺1百萬。
「我同太太直覺樓價會下跌，所以決定租樓一年，但發現樓價不跌反升，一年後決定以410多萬元購入680呎呢個心儀單位，一直住到依家，依家層樓應該過千萬，諗番起來算係好彩。」
沒有「靠父幹」置業確實困難，李先生當年一日打兩份工，每晚僅睡三小時，節衣縮食下儲到3成（36萬）首期。
「其實當年息口近十厘，即係當你供款1萬元，只有3千是本金，其餘7千是利息，樓價連利息負荷非常重；相比起現時按揭利息本金約8千元，其實來來回回差距好大。」
有調查發現，本港半數父母認為幫助子女「上車」遠比個人退休重要，李生直言自已也不例外，希望為子女提早完成置業夢，但卻擔心愛他反變成害他，「以現今瘋癲樓價，置業需要父母資助係無可厚非，打工仔無可能儲到首期。我認為就算能幫到子女負擔首期，也要視乎佢哋有無能力，勉強助子女上車，反而會唔會令佢哋每月節衣縮食，入不敷支，每個人如何過生活，看法也不一樣。」